Memorial page of Tigi

Liebe Tigi, min süesse chline Pirat, du bisch zu mir cho, und sofort hani mich unsterblich i dich verliebt. Du bisch ahänglich, lieb, verschmust gsi - ich hett alles gmacht für dich. Mir händ einiges zäme erläbt, Wunde gheilt, um dis rächt Aug gkämpft, aber dänn häsch es doch verlore. Das hät dich überhaupt nöd gstört, min chline Pirat, nei, du häsch witer Müüs hei bracht wie vorher. Min Tigi-Liebling, jedes Bitzeli, woni ha chöne mache für dich, häsch du mir tuusigfach zrugg ge. Wänns mir schlächt gange isch, bisch du da gsi und häsch gspürt, was ich bruche, du häsch di a mich glehnt, mir dini Treui und Zueneigig gschänkt. Du bisch es fantastischs, gfühlvolls Wäse gsi. Am Neujahrsabig häsch du dich, wahrschinlich vome Auto schwer verletzt, hei gschleppt und bisch dusse vor dim Törli zämebroche. Ich bi so verzwiflet gsi, ha di welle rette, aber au im Tierspital händs dir nüme chöne hälfe. Ich liebe dich, min Tigi, mis Toggeli, min wunderbare Partner. Danke, dass du mich usgwählt häsch, danke, dass ich 7 Jahr ha dörfe mit dir zäme verbringe. Ich hoffe, du bisch jetzt wieder zäme mit dim beste Fründ, em Garfield. Dass du im Chatzeparadies bisch, da gits kei Zwifel, will s Paradies isch s Mindeste, was du verdient häsch. Du fehlsch mir, min Liebling.