Memorial page of Tiggy

Liebs Tiggy Itz isch es schon zwöi Tag här dass ig Di ha müesse über d'Rägebogebrügg la ga! Es tuet so weh, dass du nümm da bisch, niemer mir me zwüsche de Füess düreziibet wen ig i'd Chuchi ga, niemer me seit ig söu itz mit cho frässe! Du bisch es ungloublech härzigs Chätzli gsy mit eme sehr eigete Charakter. Wenn isch gschmüselet worde hesch Du bestimmt, u Bsuech hesch nid chönne usschtah, die meischte Lüt hei vo Dir nome e Gupf unger dr Bettdecki gseh! Während 13 Jahr bisch Du ganz ganz äng mit dim grosse Brueder Zwirbel gsy, wo Dir scho letscht Jahr isch vorusgange. Nachdem dr Zwirbel i Chatzehimu isch, isch es Dir na dis na immer weniger guet gange. Du hesch kämpft u mir hei zäme aues probiert, dass es Dir besser gieng. I den letschte Monate sy mir zwöi üs de o ganz nach cho, wüu Du immer meh d'Nechi gsuecht hesch. Itz isch dr Zytpunkt cho wo mir hei gwüsst, im Chatzehimu wirds Dir besser ga! I Gedanke begleiten ig Di über d'Brügg u hoffe ganz fescht, dass de dr Zwirbel wieder findisch u Dir wider zäme chöit gniesse. Obwou ig im Momänt ganz viu Träne ha u Du e grossi Lücke hingerlasch, bin ig fescht dankbar für die fasch 14 jahr Fröid wo Du mir hesch gschänkt. Mis Härz geit mit Dir über d'Rägebogebrügg, ig bi sicher es wird Dir guet ga. E letschte feschte Knuddel!