Gedenkseite von Kisha

Mini chlini Kisha hani leider 2 Täg nach ihrem 17. Geburtstag müesse lo ischläfere am 1. Februar 2022. 12 Wuche aut isch si gsi wo si zu mir isch cho, het knapp uf mire Hang Platz gha... Knapp 17 Johr isch si när es gliebts Familiemitglied gsi. Vor auem i de letschte Johre isch kei Obe vergange, wo si nid zu mir ufs Sofa wär cho und uf mir abgläge isch und när vilich 1 Stung vor sich "häre knurrlet" het. Das wird ig sehr vermisse und es duet immer no sehr weh. Ig dänke jede Tag a sie und wenn ig mängisch es Grüsch ir Wohnig ghöre mein ig si chunnt grad ume Egge... Ig weiss aber, dass si bi mir es sehr schöns Läbe het gha und ig wünscht mir vilich nume es wär am Schluss nid ganz so schnäu gange. :( Dank em Krematorium Kirchberg ha ig mini Kisha zmingscht zumene chline Teil ou witerhin bi mir. Die goldigi Pyramide schimmeret sehr schön und si het es schöns Plätzli i mim Arbeitszimmer bercho, so isch si während ig Homeoffice mache ou jederzit bi mir. Ruhe in Frieden meine Kleine.