Gedenkseite von Livia (aka Liveli), Nunu

Livia aka Liveli ❤️ Nunu Im August 2018 hett dich mis Mami uf de Strass gfunde und zu mir hei bracht, will du ihre nüme vo de Siete gwiche bisch und mis Mami angst gha hett dass du no überfahre wirsch. Es isch liebi uf de ersti Blick gsi und ich bin so froh gsi.. Dass du hesch dörfe bi mir bliebe, denn au nach sehr langem sueche händ mir niemer gfunde wo dich vermisst hett. Ich han mich immer gfragt wie mer so es wunderschöns und tolls Büsi wie dich nöd kann Vermisse aber wie scho gseit bini froh gsi, denn es hett gheisse dass du bi mir hesch dörfe bliebe. De Sunntig (5.Sep.2021) han ich mich mit schwerem Herze müsse verabschiede. Will mer bi dir en vortgschrittene Herzfehler endeckt hett, zu dem hesch du Wasser in der Lunge gha. D Ärtz händ alles versuecht dich z rette aber leider hett sich din Zuestand nöd verbessered und bevor du die Welt hesch müsse elai in dere Surstoffbox qualvoll verloh, han mich endschiede dich ga zla. Ich weiss dass du tapfer für mich Kämpft hesch aber ich han dich ned welle wieder liede la und s Risiko dass dus nid schaffsch isch einfach viel zu gross gsi. So bisch du uf dim Weg in Katzehimmel nöd elai gsi und nöd in dere Surstoffbox, Sondern bi mir, bi dim dich überalles liebende Mami uf de Schoss. Ich han dir gseit dass es okey isch du nüme Kämpfe und liede musch, dass es okey isch und du dörfsch go. Dass ich dich für immer liebe wird und du immer in mim Herze sie wirsch. Ich danke dir für die wunderschöne drü Jahre wo ich mit dir han dörfe erlebe und ich weiss dass du es schöns lebe bi mir gha hesch. Ach Nunu ich vermisse dich so sehr.. es bricht mir s Herz dich nieme z Miaue oder z schnurrle z ghöre. Du bisch so e wunderschöni und einzigartigi Katz gsi. Du hesch so en wundervolle goldige Charakter gha. Ich kanns einfach ned verstah, es isch alles viel zu schnell gange.. Livia Mami liebt dich ganz fest für immer und ewig du bisch mis Herz und wirsch in mim Herze für immer wieder Lebe.