Gedenkseite von Kiki

Mis gliebtä chlinä Kiki ❤️ Z Schicksau het üs zunenand gfüehrt. Du bisch mit 4-jährig zu mir cho u i ha dir dörfä äs nöis, bessers Läbä schänkä. Mir si vo afang ah äs Team gsi. Mini unändlechi Liäbi hei dini Narbe usder Vergangeheit Stück für Stück gheilet. Im Gegezug hesch du, ganz unbewusst dür dini Existänz u dini Liäbi für mi, mi dür ganz e schwiregi Zyt begleitet u bisch immer fürmi da gsi u heschmer Chraft gä. Du weisch aui mini Gheimnis u bisch mini beschti Fründin. I hadi so fescht brucht. Zu üsem Team het plötzlech e Ma derzue ghört. Paar Jahr später es Baby. Du bisch di liebevousti u rücksichtsvousti Bussä gsi wos nume git. Du hesch zwar z Bebe am liebste gha wes het gschlafe. U du hesch d Freiheit immer wie meh gnosse u bisch viu meh dusse umetigeret. Aber am Abe hesch immer dis Plätzli näb üs gfunde u hesch gschnürelet i vouer Lutsterchi. Iz, churz nachdäm du 11i bisch worde, hesch du vo eim Tag ufe ander nüm möge. Du hesch nach mir grüeft. Mir hei di sofort zum Tierarzt u am Tag druf is Tierklinik bracht. Es isch ä schwäre, fortgschrittene Härzfähler diagnostiziert worde. Mini Wäut isch zerbroche, wo mir di am Tag druf hei müässä la ga. Liebs Kiki, i ha nie glehrt ohni di glückläch z'si. I weiss nid wieni ohni di cha witerga. I weiss nid wieni mit dere Lääri u dere Lücke, wo hesch hingerla, jemaus cha umga. Mis liäbä chlinä Kiki, du bisch nümme da u mis Härz isch so ungloublech zerbrochä. I wet so gärn wüsse, wo du iz bisch u was du iz machsch. Es söuder eifach guet ga, ds isch mi gröscht Wunsch! Vermiss mi nume chli, ömu nid so fescht wie ig di..❤️ I liäbä di vo ganzem Härzä u danke dir für aues wo du bisch fürmi gsi. I wirde di niä vergässä ❤️